Neumitglieder

Ich möchte Gnom werden...

Neumitglieder

Neumitgliederdaten
captcha

No ned öberzüügt?

Ech be immer no ned ganz öberzüügt…!!

Den lömmer doch eifach die z' Wort cho, wo erst grad vor chorzem de Schritt zu eus „gwoogt“ hend, eusi Neu-Gnome:

Philip

Mis Instrument: Trompete

Bi de Gnome will?
Gnome hend en super Sound. Es isch es grosses Vergnüege, dete metzmache ond ech freue mech uf en rüüdigi Fasnacht 2018!

Warum söllsch Du zo de Gnome?
Be de Gnome hemmer en tolli Mischig zwösche Jong und Alt, währed de Probe herrscht en super Stemmig. Ond met de Chappelgnome wird d'Fasnacht sicher rüüdig! 

Martina

Mis Instrument: Horn

Bi de Gnome will?
En gueti Fröndin und ich hend zunere typische Lozärner Guggemusig welle ond mer hend bereits veli Uftrett vo de Chappelgnome mitgfiiered. Ond obwohl mer fascht niemert könnt hend, semmer vo Afang a met offne Arme empfange worde.

Warum söllsch Du zo de Gnome?
En bunt durchmischte, geile Huufe miteme kollegiale Umgang und mer fühlt sich schnell als Teil vo dere Guggemusig.

Conny

Mis Instrument: Posuune

Bi de Gnome will?
Ich ha scho sit einige Johre zu de Chappelgnome welle. Das isch eifach en Verein wo mer sech vom erste Tag a willkomme und wohl fühlt. Und das gspührt mer au als Zueschauer, die Herzlichkeit und s’Unkomplizierte hend mer scho immer imponiert!

Warum söllsch Du zo de Gnome?
D’Gnome hend wirklich coole Sound ond es wird güebt, bis es sitzt, so dass es denn auch wirklich guet tönt. Schön ist, wie Anfänger ufem Instrument begleitet werded. D’Gnome send en «riese Huufe» aber trotzdem «fascht en Familie».
Was ech söscht no wett säge:
Chom zu de Gnome und du wirsch öppis erläbe, was dir es ganz neues Fasnachtsfeeling bringt!

Yan

Mis Instrument: Posuune

Bi de Gnome will?
Ich be eigentlich nur für min Kolleg zu de Gnome cho, damit er ned alleige muess. Aber set ich debi be, möcht ech kei Sekonde misse! Es macht so viel Spass und ich bereues kei Moment.

Warum söllsch Du zo de Gnome?
Bi de Gnome bisch ned en „Niemand“, sondern bisch Teil vonere grosse Familie. Me heds lostig und fiiret ond lachet zäme, es lohnt sech do debi z’sii!

Was ech söscht no wett säge:
Trauid de Trompete ned, Posuune spelle esch scho immer vell besser gsi! :-)

Ramona

Mis Instrument: Trompete

Bi de Gnome will?
…well ich set ech cha dänke a de Fasnacht mit debii be ond s för mech scho emmer klar gsi esch, dass ech früehner oder spöter mal Teil vonere Guggemusig werd sii. D Rolle als Zueschauer hani gnueg lang gspielt, ez versuech ichs met de Trompete!
För d'Gnome han ech mech entschiede, well ech zonere grosse Stadtlozärner Guggemusig ha welle ghöre, wo mech Jahr för Jahr musikalisch begeistered hed. So han ech mech, obwohl ech praktisch niemert könnt hat, als Neumitglied beworbe. Scho nach chorzer Ziit i dem Verein han ech gwösst, dass ech die richtig Entscheidig troffe ha

Was ech söscht no wett säge:
Bis jetzt hani en sehr idröckliche, tolle Start is Vereinsläbe miterläbt. Cha d Fasnacht und de erst Uftritt uf de Stäge chuum erwarte!

Alex

Mis Instrument: Horn

Bi de Gnome will?
Ich bi zu de Gnome gange, well min Sohn (wo scho länger en Gnome esch) so begeistered ist vo dem Verein.

Warum söllsch Du zo de Gnome?
Gang zu Gnome ane Uftrett, lueg ihne zue, los ihne zue, red mit ihne; du wirsch gseh, wie herzlich de Umgang isch.

Was ech söscht no wett säge:
Faszinierend isch, dass du dich do vom erste Tag a als Gnom fühlsch!

Joy

Mis Instrument: Horn

Bi de Gnome will?
Ech be med de Gnome ufgwachse ond ha daher scho velli vo ehne sit chli uf kennt. För mech esch es drom emmer klar gsi dass ech mol zo de Chappelgnome wet.

Warum söllsch Du zo de Gnome?
Es esch en tolli Trope wo jede ufnimmt ond en Chance ged. Mer hend cooli Stöck zom spiele ond es ged emmer öppis zom Lache.

Was ech söscht no wett säge:
Ech freue mech riesig uf en lostigi Fasnacht met de Gnome. 

Du, ein Gnom?

  • Hesch du au de Plausch a de Lozärner Fasnacht?
  • Möchtisch du d'Fasnacht aktiv mitgestalte?
  • Die rüüdige Täg, also de absoluti Höhepunkt vo de Lozärner Fasnacht, huutnöch miterläbe?
  • Könnsch velecht sogar scho es paar vo de Gnome oder möchtisch sie no könnelehre?
  • Dier gfallt euse Sound?
  • Du hättisch de Plausch, es Sujet kreativ umzsetze?
  • Du besch gern inere lostige Rondi amene Fest?

Wenn du mindestens 11 von dene 7 Froge met JO chasch beantworte ond 18ni gsi besch (oder gli wersch), den besch be üs genau richtig, also nüd wie los ond s'Ameldeformular usfölle!

Hüüfige Usrede... ääähh Froge

  • Ich ha jo gar keis Instrument glehrt ond/oder cha kei Note läse!
    Keis Problem, mer au ned, aber mer helfed dier gern debi, dass au du dies Wonsch-Instrument gli im Greff hesch. Ond söscht send au helfendi Händ am Kafiwage oder als Fahneträger sehr willkomme!
  • Ich könne veli Lüüt be andere Musige!
    Macht nüd, mer jo au
  • Äääh ech möchte a de Fasnacht ned bonde si, sondern selber omezieh ond dete hi go, wo's mer gfallt!
    Wenn du met dine Gnome-Gspändli onderwegs besch, besch garantiert dete, wo's dier gfallt
  • Ich weiss ned, öb ech gnüegend Ziit ha?
    Ziit hed mer nie eifach so, die muess mer sech nä! Aber wenns eim werkli Spass macht, den nimmt mer sech die Ziit gern
  • Ich ha no meh Froge, aber getrau mech ned, die z'stelle?
    Kein Angst, eifach üs kontaktiere, mer wössed uf jede Frog en blödi Antwort

Mer wärded ca. 1 Monet noch de Fasnacht alli Bewerberinne und Bewerber zumene Info-Obig ilade. Dete erfahrsch alles, was es wössenswerts rond om üse Verein geht.

Neumitglieder send aber au spöter no herzlich Willkomme, also nor well de Info-Obig verpasst hesch, brecht kei Welt zäme. Meld dech eifach be üs.

Wieteri Uskönft gänd dier aber au jederziit gern de Präsi Erich "Bubi" Koller oder üse Tambi Roli Kurz.